Aðalfundur KFR og Keilarar ársins 2016

Í kvöld fór fram aðalfundur KFR fyrir árið 2016 en þar var meðal annars farið yfir ársreikninginn fyrir árið 2016 og valið keilara ársins 2016 og einnig var ný stjórn kosin. Fínasta mæting var í Laugardalinn þar sem fundurinn fór fram.

Kvennkeilari ársins 2016 hjá KFR var valin Hafdís Pála Jónasdóttir en hún varð m.a. Íslandsmeistari einstaklinga 2016 og varð fyrsta konan til að spila 300 leik.

Karlkeilari ársins 2016 hjá KFR var valinn Arnar Davíð Jónsson sem varð m.a. Íslandsmeistari einstaklinga 2016.

Einnig var kosin ný stjórn en Guðjón Júlíusson lét af störfum sem formaður félagsins en hann verður þó varamaður í stjórn áfram. Nýr formaður KFR er Stefán Ingi Óskarsson lærlingur mikill en frábært er að fá hann aftur inn í félagið eftir nokkur ár í KR. Með honum í stjórn eru áfram þær Hafdís Pála Jónasdóttir og Svanhildur Ólafsdóttir, inn í stjórn komu svo þeir Gústaf Smári Björnsson og Steinþór Geirdal Jóhannsson en þeir leysa af hólmi Sesselju Unni Vilhjálmsdóttir og Guðlaug Valgeirsson. Að lokum er svo Böðvar Már Böðvarsson varamaður í stjórn.

Á fundinum var svo tilkynnt að Arnar Davíð kemur inn í þjálfarateymið hjá unglingunum á næsta tímabili og kemur til með að hjálpa ennþá frekar þróun okkar ungu og efnilegu keilurum.

Við í fráfarandi stjórn þökkum öllum sem mættu á fundinn í kvöld og vonum að árið 2017 og næstu ár verði ennþá betri hjá félaginu.

arnar og hafdis

 

Lærlingar í úrslitin um Íslandsmeistaratitilinn

KFR-Lærlingar eru komnir í úrslitaeinvígið um Íslandsmeistaratitil liða eftir frábæran sigur á fráfarandi Íslandsmeisturum í ÍR-PLS.

Báðir leikirnir voru frábær skemmtun en Lærlingar leiddu 8,5-5,5 eftir fyrri leikinn. PLS menn byrjuðu seinni leikinn á sterkum 3-1 sigri en Lærlingar komu grimmir til baka og unnu 4-0 í leik 2. Eftir það þurftu þeir bara 1 stig í viðbót en þeir gerðu gott betur og unnu lokaleikinn 3-1 og samtals 10-4 í leik gærkvöldsins. Samtals 18,5 – 9,5.

Í hinum undanúrslitaleiknum mættu KFR-Stormsveitin deildarmeisturum ÍR-KLS og reyndust KLS menn of erfiðir fyrir Stormsveitina. KLS unnu fyrri leikinn 13-1 og þurftu því bara 1,5 stig í seinni leiknum en þeir tóku 2 stig í fyrsta leik og kláruðu einvígið.

Á sama tíma fór fram umspil um sæti í 1.deild kvenna en þar mættust KFR-Valkyrjur Z og KFR-Elding. Fóru leikar þannig að Valkyrjur Z unnu nokkuð örugglega og halda sæti sínu í 1.deild kvenna.

Úrslitin í bæði karla- og kvennadeildinni hefjast á sunnudaginn klukkan 19 og mælum við með því að fólk mæti og styðji sitt fólk. Kvennamegin mætast núverandi Íslandsmeistarar KFR-Valkyrjur og ÍR-TT en karlamegin eru það KFR-Lærlingar og ÍR-KLS.

laerlingar

Andlátsfregn †

Árni Gíslason liðsstjóri KFR-Lærlinga varð bráðkvaddur í gær, laugardaginn 29. apríl í Keiluhöllinni í Egilsöll.

Keilufélag Reykjavíkur sendir ættingjum og vinum innilegar samúðarkveðjur.

Blessuð sé minning hans.

Arni-Gisla

Arnar Davíð komin heim

KFR-Lærlingar hafa fengið góðan liðsstyrk eftir að landsliðsmaðurinn Arnar Davíð Jónsson sem hefur verði búsettur í Noregi ákvað að flytja heim heim til Íslands. Arnar kom til landsins í gær og mætti beint í Keiluhöllina til að spila með Lærlingum sem áttu útileik á móti KR-E. Lærlingar unnu leikinn 9-5 en Arnar spilaði alla 3 leikina og endaði með 721 seríu.

Arnar Davíð mun koma inn í þjálfarateymi KFR fyrir næsta tímabil en undanfarið hafa þeir Skúli Freyr og Aron Fannar séð um þjáflun félagsins með frábærum árangri.

Framundan er úrslitakeppni í 1. deild karla og kvenna og þar spila 3 lið frá KFR, hjá körlunum eru það Lærlingar og Stormsveitin en Valkyrjur hjá konunum.

laerlingar

Mynd: KFR-Lærlingar – Arnar Davíð Jónsson, Skúli Freyr Sigurðsson, Guðlaugur Valgeirsson og Freyr Bragason

KFR 1 í úrslit!

KFR 1 tryggði sér í morgun sæti í úrslitum í Íslandsmóti Unglingaliða þegar liðið gerði jafntefli í síðasta leik á móti ÍA1 sem hafði ekki tapað stigi í allan vetur! Málfríður Jóna Freysdóttir átti 2 pinna eftir og tók aðra til að tryggja liðinu jafnteflið og með því endaði liðið einu stigi fyrir ofan ÍR 2 sem endaði í 3.sæti í riðlinum.

Úrslitin fara fram á morgun en KFR 1 mætir þá ÍR 1 en vinna þarf 2 leiki til að koma sér í úrslit þar sem andstæðingurinn er ÍA 1 eða ÍA 2.

Stelpurnar2017

Málfríður (önnur frá hægri) var hetjan í dag.

Liðakeppninni lokið á EM

Liðakeppnin hjá Stelpunum spilaðist í gær og í morgun og enduðu íslensku stelpurnar í 8.sæti en stelpunum okkar Helgu og Málfríði gekk mjög vel í seinni hlutanum í morgun.

Þær byrjuðu í gær, á miðvikudeginum en þá spilaði Málfríður 421 í 3 leikjum og Helga spilaði 454 í 3 leikjum. Þær stórbættu sig hinsvegar báðar í morgun en þá spilaði Málfríður 501 í 3 leikjum en það er í fyrsta sinn sem hún spilar yfir 500 í 3 leikjum. Helga Ósk spilaði svo 494. Samtals spilaði Málfríður því 922 í liðakeppninni en Helga spilaði 914.

Helga situr í sæti 46 í heildarkeppninni með 164,8 meðaltal en Málfríður er í sæti 50 með 143,2 meðaltal og er hún búinn að hækka sig um 9,5 pinna milli sería.

Stelpurnar eru í fríi á morgun en spila svo í einstaklingskeppninni á laugardaginn.

Stelpurnar2017

Fyrsta degi lokið hjá Stelpunum á EM

Það eru tveir keppendur frá KFR á EYC2017 eða Evrópumóti Unglinga yngri en 18 ára sem fram fer í Helsinki að þessu sinni en það eru þær Helga Ósk og Málfríður Jóna Freysdætur úr Valkyrjum Z.

Helga Ósk hóf keppni í morgun í tvímenningskeppni með Elvu Rós úr ÍR en þær enduðu í 20.sæti þar sem Helga spilaði ágætlega og endaði með 1029 eða 171,5 meðaltal sem er 15 pinnum meira en meðaltal hennar hérna heima. Flott byrjun hjá Helgu.

Málfríður spilaði svo í seinna hollinu með Guðbjörgu Hörpu úr Þór en þær enduðu í 22.sæti en Málfríður er að spila á sínu fyrsta móti erlendis og endaði hún með 796 seríu eða 132,7 meðaltal sem er aðeins undir hennar meðaltali hérna heima.

Í allsherjarkeppninni er Helga í 40.sæti en Málfríður er í 50.sæti. Stelpurnar spila næst á morgun klukkan 13:15 (10:15 íslenskum tíma) í liðakeppninni með Guðbjörgu og Elvu.

IMG_6943

Bikarmeistarar 2017 eru KFR-Afturgöngur og KFR-Lærlingar

Um síðustu helgi fóru fram úrslit í Bikarkeppni KLÍ. Það var tvöfaldur sigur fyrir KFR en það voru KFR-Afturgöngur sem sigruðu í kvennaflokki og KFR-Lærlingar í karlaflokki.

Í karlaflokki mættust KFR-Lærlingar og KFR-Grænu Töffararnir. Lærlingar unnu sannfærandi sigur 3-0 og var samanlagt skor 1849-1542.

Í kvennaflokki mættust KFR-Afturgöngur og ÍR-BK. Þessi viðureign var mun meira spennandi heldur en karlamegin en Afturgöngur unnu 3-0 og var samanlagt skor 1444-1280.

Sýnt var frá 2 leikjum í hvorri viðureigninni í beinni útsendingu á RÚV og hægt er að horfa á upptöku af henni með því að smella hér.

IMG_0607