Category: Annað

KFR 1 í úrslit!

KFR 1 tryggði sér í morgun sæti í úrslitum í Íslandsmóti Unglingaliða þegar liðið gerði jafntefli í síðasta leik á móti ÍA1 sem hafði ekki tapað stigi í allan vetur! Málfríður Jóna Freysdóttir átti 2 pinna eftir og tók aðra til að tryggja liðinu jafnteflið og með því endaði liðið einu stigi fyrir ofan ÍR 2 sem endaði í 3.sæti í riðlinum.

Úrslitin fara fram á morgun en KFR 1 mætir þá ÍR 1 en vinna þarf 2 leiki til að koma sér í úrslit þar sem andstæðingurinn er ÍA 1 eða ÍA 2.

Stelpurnar2017

Málfríður (önnur frá hægri) var hetjan í dag.

Liðakeppninni lokið á EM

Liðakeppnin hjá Stelpunum spilaðist í gær og í morgun og enduðu íslensku stelpurnar í 8.sæti en stelpunum okkar Helgu og Málfríði gekk mjög vel í seinni hlutanum í morgun.

Þær byrjuðu í gær, á miðvikudeginum en þá spilaði Málfríður 421 í 3 leikjum og Helga spilaði 454 í 3 leikjum. Þær stórbættu sig hinsvegar báðar í morgun en þá spilaði Málfríður 501 í 3 leikjum en það er í fyrsta sinn sem hún spilar yfir 500 í 3 leikjum. Helga Ósk spilaði svo 494. Samtals spilaði Málfríður því 922 í liðakeppninni en Helga spilaði 914.

Helga situr í sæti 46 í heildarkeppninni með 164,8 meðaltal en Málfríður er í sæti 50 með 143,2 meðaltal og er hún búinn að hækka sig um 9,5 pinna milli sería.

Stelpurnar eru í fríi á morgun en spila svo í einstaklingskeppninni á laugardaginn.

Stelpurnar2017

Fyrsta degi lokið hjá Stelpunum á EM

Það eru tveir keppendur frá KFR á EYC2017 eða Evrópumóti Unglinga yngri en 18 ára sem fram fer í Helsinki að þessu sinni en það eru þær Helga Ósk og Málfríður Jóna Freysdætur úr Valkyrjum Z.

Helga Ósk hóf keppni í morgun í tvímenningskeppni með Elvu Rós úr ÍR en þær enduðu í 20.sæti þar sem Helga spilaði ágætlega og endaði með 1029 eða 171,5 meðaltal sem er 15 pinnum meira en meðaltal hennar hérna heima. Flott byrjun hjá Helgu.

Málfríður spilaði svo í seinna hollinu með Guðbjörgu Hörpu úr Þór en þær enduðu í 22.sæti en Málfríður er að spila á sínu fyrsta móti erlendis og endaði hún með 796 seríu eða 132,7 meðaltal sem er aðeins undir hennar meðaltali hérna heima.

Í allsherjarkeppninni er Helga í 40.sæti en Málfríður er í 50.sæti. Stelpurnar spila næst á morgun klukkan 13:15 (10:15 íslenskum tíma) í liðakeppninni með Guðbjörgu og Elvu.

IMG_6943

Bikarmeistarar 2017 eru KFR-Afturgöngur og KFR-Lærlingar

Um síðustu helgi fóru fram úrslit í Bikarkeppni KLÍ. Það var tvöfaldur sigur fyrir KFR en það voru KFR-Afturgöngur sem sigruðu í kvennaflokki og KFR-Lærlingar í karlaflokki.

Í karlaflokki mættust KFR-Lærlingar og KFR-Grænu Töffararnir. Lærlingar unnu sannfærandi sigur 3-0 og var samanlagt skor 1849-1542.

Í kvennaflokki mættust KFR-Afturgöngur og ÍR-BK. Þessi viðureign var mun meira spennandi heldur en karlamegin en Afturgöngur unnu 3-0 og var samanlagt skor 1444-1280.

Sýnt var frá 2 leikjum í hvorri viðureigninni í beinni útsendingu á RÚV og hægt er að horfa á upptöku af henni með því að smella hér.

IMG_0607

Meistaramót Ungmenna

Laugardaginn 1 apríl fór fram síðasta umferð í Meistaramóti Ungmenna og þar tóku 9 ungmenni frá KFR þátt.
Þar sem þetta var síðasta umferð vetrarins voru einnig gefin verðlaun fyrir fjölda stiga yfir tímabilið. Stigum var safnað úr hverri umferð en 1 sæti gefur 12 stig, 2 sæti 10 stig, 3 sæti 8 stig og svo framvegis.

Í fyrsta flokki pilta spilaði Aron Fannar og endaði hann í 2 sæti. Einnig lenti hann í öðru sæti yfir veturinn.

Í fyrsta flokki stúlkna spilaði Katrín Fjóla og sigraði hún sinn flokk í dag og yfir veturinn.

Í öðrum flokki stúlkna spilaði Helga Ósk og sigraði hún sinn flokk í dag. Hún var einnig með flest stig í sínum flokk yfir veturinn.

Í 3. flokki pilta spilaði Vébjörn Dagur og spilaði hann mjög vel og sýndi miklar framfarir. Einar Máni endaði í 3. sæti yfir veturinn í sama flokk.

Í 3. flokki stúlkna spilaði Málfríður og  Eyrún og stóðu þær sig mjög vel. Málfríður endaði í 3.sæti eftir veturinn.

Í 4. flokki pilta spilaði Mikael Aron og sigraði hann sinn flokk í dag og var einnig í 1. Sæti eftir veturinn.

Í 4 flokki stúlkna spilaði Nína Rut og endaði hún í 3 sæti bæði í þessari umferð og eftir veturinn.

Í 5 flokki spilaði Fjóla og spilaði hún mjög vel og bætti hún persónulega met í 1 ,2 og 3 leikjum.

Íslandsmót Öldunga

Íslandsmóti Öldunga lauk í dag og tryggði Ragna Matthíasdóttir í Keilufélagi Reykjavíkur sér sigurinn í kvennaflokki.
Í öðru sæti var Jóna Gunnarsdóttir og Bára Ágústdóttir í því þriðja, báðar úr KFR.

Karla meginn vann Guðmundur Sigurðsson (ÍA) og í öðru sæti varð Kristján Þórðarson (KR). KFR-ingurinn Sveinn Þrastarson endaði svo í þriðja sæti.

Óskum við hjá KFR okkar fólki hjartanlega til hamingju með árangurinn.

Ragna Matthíasdóttir (KFR) og Guðmundur Sigurðsson (ÍA)
Ragna Matthíasdóttir (KFR) og Guðmundur Sigurðsson (ÍA)

Heilsuefling eldri aldurshópa – Hvað ætla stjórnvöld að gera?

Heilsuefling eldri aldurshópa og hvað stjórnvöld ætla að gera til að hrinda í framkvæmd markvissri heilsuefnlingu er viðfangsefni hálfs dags ráðstefnu sem verður haldin í Tjarnarsal Ráðhúss Reykjavíkur þann 16. mars næstkomandi.

Rannsóknir hafa margsinnis staðfest að hreyfing og hollt mataræði leika lykilhlutverk til að bæta heilsu eldri borgara.

Á ráðstefnunni verður annars vegar farið ofan í saumana á því hvernig best er að standa að þessari heilsueflingu, fjallað um félagslega þáttinn og þátt næringar og hvers konar heilsurækt henti fólki í eldri aldurshópum. Meðal þeirra sem taka til máls eru öldrunarlæknir, íþrótta- og heilsufræðingur, heilsuhagfræðingur, félagsfræðingur og fyrrum íþróttamaður.

Hins vegar sitja borgarstjóri, landlæknir, heilbrigðisráðherra og sveitarstjóri fyrir svörum um það hvernig stjórnvöld ætla að beita sér í þessum efnum. Þessir aðilar hafa þegar fengið hnitmiðaðar spurningar um heilsueflingu sem þeir byrja á því að svara áður en þeir setjast í pallborðið.

„Ömurlegt er að eldast“ sungu ungu mennirnir í Rolling Stones fyrir hálfri öld (What a drag it is getting old). Nú er Mick Jagger orðinn 73 ára, sprækur sem aldrei fyrr þegar hann hendist þindarlaus um sviðið á tónleikum hljómsveitarinnar. Lykill hans að góðri heilsu og þoli er sá sami og hjá öllum öðrum sem bera sig eftir því, að stunda heilsurækt og borða hollt.

Ráðstefnan verður  í Tjarnarsal Ráðhússins. Hún er öllum opin og aðgangur ókeypis. Ráðstefnan hefst kl. 14 með ávarpi forseta Íslands, Guðna Th. Jóhannessonar.

Ráðstefna 16. mars - Aldrei of seint - Heilsuefling eldri aldurshópa - 23.2.17 copy

Elítumót KFR 2017 – Úrslit

Í kvöld var Elítumót KFR haldið í 4 skiptið. Mætingin var ágæt og mættu þónokkrir leikmenn sem ekki hafa kastað kúlu í lengri tíma. Mótið var æsispennandi og í flokki 41-50 ára voru Sigurður Þorsteinsson og Jóhann Ágúst Jóhannsson jafnir með hæsta skor í flokknum en Sigurður var með hærri síðasta leik og var því sigurvegari í flokknum.

KFR þakkar þátttakendum fyrir komuna í þetta skemmtilega mót og vonumst við að sjálfsögðu til að sjá fleiri þátttakendur á næsta ári.

Hér má sjá úrslit í öllum flokkum ásamt nokkrum skemmtilegum myndum frá kvöldinu:

Elítumót 2017